Salt Lake City, UT., Tijōmba 5, 2020
Kōmeḷeḷe jān William Swain
Wiik eo ej jemlokļo̧k je kar kemem e Thanksgiving Day, ak Kamoolol Day eo an ri Majōl kom ar ke kemem e. Aaet, ewōr raan ņe ilo Majōl, jarjartok jān juōn kakien eo kar jakeļo̧k im̧aan Nitijelā eo an jān former Kwajalein Senator Ataji Balos. Eokwe jekdoon raan ōt Ian raan kein ruo kwaar kemem e ippān baamle eo am, ak eaorōk bwe jen kar kamoolol.
Juōn manit ilo baamle e aō kemij kōm̧m̧ane: ālkin wōt jar in kōjeram̧m̧ane mōn̄ā ko wieokan raan in kamoolol in, juōn inlok juōn ej kwalok men ko ej kamoolol kaki. Kōnke Junjun eo eaar kōmatte kōjota eo, eaar kwalok men ko en kamoolol kaki ālkin wōt boss eo an baamle e, jinen. Im ke kōmij jino mōn̄ā kōjota in enno imaan mejen ij komlānļo̧kijen kōn jon̄an mōn̄ā ko laddik in nejū eaar kōpooji im jon̄an an ro nukimro aikuij kijieer eļaptata kiiō ilo tōrre in im coronavirus em̧ōj lukwōj men otemjej.
Iaar bar lōmņak kōn manit in Majōl eo ejelōt raan kein relļap: Nuclear Victims Day, Ri Jerbal Day, Kamm̧oolol Day, Kūrūjmōj, im New’s Year Day. Ijeļā ke men de in enaaj kabōrak kōj jān koba ippān doon ilo Kūrūjmōj in, COVID-19 Coronavirus, āinwōt an kar kabōjrak elōn̄ nokte jān koba ippān doon ilo Kammoolol Day eo wiik eo lo̧k. Ejjelok kajjitōk ke manit in Majōl doktak jān jekjek in.
Elan̄n̄e komijn kememejļok elōn̄ naan rej kwalok aorōk in men in mōn̄ā im wāween an jelōt manit eo ad. Ilo ad kakemejmej doon kōn men kein jej jino ippān jeeban manit, irooj. Naan irooj (er wōj, ej kōmmelele eo iaar ron̄) melelein elōn̄ armej. Ijo in im naan in “kajoor wōt wōr” ej itok jān e. Juōn irooj ekajoor elan̄n̄e ewōr doon ak an kajoor. N̄an an maron̄ lale armej rein rellōn̄ doon, eaikuij lale er ilo elōn̄ wāween, ekobaik kōjparok mōn̄ā jekdoon n̄e jidik wot ak ej lale bwe en wōr naan in ilubwilijier: ajeej dikdik kōjatdikdik. Ej barāinwōt lale bwe en ejjelok naan in ippāer: kwo mōn̄ā ijabliklik kā, kwo drodro timmmej, kwo drodro timmej im ren jeļāņae doon ilo aer kōjparok naan in enrā bwe jen lale rā rā. Ak bwe juōn ajiri en jeļā jabōn Kennan kei im aorōk ko aer, ej eaikuij ijjino ippān jinen ilo kapijuknen eo an. Ijo in ajiri in enaaj ekatak aorōk in naan in kwo mōn̄ā ippān jinōm, ekōjatdik eok. kwo mōn̄ā ijabliklik kā, kwo drodro timmmej, kwo drodro timmej.
Ippān ri pālle naan in ej jerbal: sharing in fair. Ak ippād ri Majōl naan eo in ajeej dikdik kōjatdikdik. Ippān ri Pālle naan in ej jerbal: haste makes waste. Mantin Majōl ekkar n̄an jimmaō oktan naan in kajin In̄lij in ilo kajin Majōl ej: mōkajkaji jelatlati batbati. Kwonaaj lo naan kein “mōkaj,” “jelat,” im “bat” (rumwij) ilo jabōn kennan in.
Elōn̄ kaje ko litok n̄an ro rej jab kōjparok naan kein, ekoba jeb bar. Im n̄an an juōn Irooj im aļap ro an jab manman armej, irooj en ej etetaltal wōt ipeļaakin aelōn̄ en ilo tōrre men ekkā al kake” al en an Irooj. Unin kōnke en jab an armej rein doon kook ak entak im jab lelok naan ak nimen.
Ilo aelōn̄ ko ad ekkan eņ an weto eņ am ej etal ilo kilōk, ejjab ilo iieb waan ak banennor. Kwōj kōjerbale banennor n̄an bōklok n̄an Irooj en am ni badbad en am. Kiiō ewōr mōn̄ā etan in m̧aan mā im ewōr juōn etan m̧aan mā. Kanuij kememej bwe naan in “m̧aan” ej kalikkar ke lūbōn bwiro rņ moktata ej kajen Irooj eņ am. Ejjelok oktak in m̧aan bōb en—-jāānkwūn en moktata ej an Irooj eņ am.
Ewōr juōn ekkan dajkdak. Ilo kōmōn̄ā in juōn wōt aļap ej bōkļok mōn̄ in ilo kilōk. Teak im emmōd enan̄in āier wōt juōn ilo jekjek in mōn̄ ko kijōm kan ilo am iuwe ioon juōn wa. Ikōmn ron̄ an jimmaō ba jen iwōj in kōpooj emmōd eo an mokta jān ad etal in eon̄ōd. Jān an kar kwalok naan in ij lōmņak emmōd eņ ej mōn̄ā eņ kijōm n̄an ejerakrōk ko iloan ānnen, ak team ej n̄an jp[laak ko reaetok.
Ak n̄e kwōj po ļo̧k ilo juōn āne bwe in teak eņ am kwōj ajeeje ilubwilijin emmaan ran raar jipan̄ ārke tipnōl en waam. Etan mōn̄ā jab en katwōjlā. N̄e irooj en ej po ļo̧k ilo juōn aelōn̄ bwe in teak en an ej ajeeje ippān aļap ran; etan mōn̄ā in kōjinibwilej. Naan kein rikkōn al in ilo kabinmeto kar eaar kine al in kijpāpinuwe im kiōk meto. Naan kein ruo eaar likiti imo jemlo̧kin chorus eo an al in: “katwōjļāiki, kōjinibwilej eo, kwo kōjatdikdik.” Oktak eo in kwōj kōjatdikdik jān kōjinibwilej en, ak ajeej en an Irooj en n̄an aļap ran an ilo an po ļo̧k ilo juōn aelōn̄.
Men in mōn̄ā ej bar pād ilo kemem, kwōjkwōj in pālele, eorāāk, an̄ak, adwaj, kapijje, im mōn̄ā ko an kabun̄ ami. Ak aolep jabōn Kennan kei im iien kein reaorōk renaaj ja bōjrak ilo Kūrūjmōj im New Year’s in jān wōt LAKIELEL ejjan̄in jemlo̧k an man kōj im jej ņa etan COVID-19.
Kōn men in, ij rōjan̄ kom bwe komin lale ta eo ejimwe im ekkar ilo bukwōn eo kwōj pād ie im kōm̧m̧ane.
Kwalok am lōmņak: jouj im email e tok eō ilo [email protected] kōn article in ak kōn bar juōn men kwōj kōņaaņ bwe jen tepiaake ijin jon̄an wōt ad maron̄. Kom̧m̧ool tata.