Yokwe eta in Ngarangi Mateariki, āt eo juon rej āñinñin eo kake ej Chloe. Ña ij juon leddik in “Tobwe Mili.” Jinō ej jān Mili im jema ej jān New Zealand. Etan jowi eo aō ej Ijiddik.
Iaar dik im rūttoļo̧k ilo Majuro im ilo 2019 eo kōmro Jinō ar em̧m̧akūt tok ñan Arkansas in. Ij kemmemej jinoin aō pād ijin ilukkuun kar ilbōk kōn joñan an lōñ uwaad ijin. Iaar roñ ke ewōr Ri-M̧ajeļ ijin, bōtaab ke iaar loe kōn meja ilukkuun bwiloñ. Ij m̧ōņōņō bwe meñe ij pād ettoļo̧k jān ro nukud im m̧ōtta ilo Majuro. Ebar wōr Jibū, Jim̧m̧a, Aunties im Uncle ijin im ro m̧ōtta mwe eļap aō epaake er. Arkansas in ej juon jikin eaibojooj, ij kememej ke ear epaak ao em̧m̧akūtok jān Majuro iaar būrom̧ōj bwe iaar ļōmņak iban bar maroñ alooje an aļ tuļo̧k āinwōt ao kōn kōm̧m̧anne ilo Majuro. Aō kijoñ lale an aļ tuļo̧k ālikin juon raan in jerbal ej juon iaan men ko rem̧m̧an ippa, jet ieen ilo Majuro ñe ij ettōr im loe an lukkuun aiboojoj im ekōļarļar lañ ij aikuj bojrak bwe in pijaiki. Akō raan eo wōt ālikin raan eo iaar joktok ijin, elukkuun kar aibojooj an aļ tuļo̧k eaar kōļar būrōrō, oran, im piiñ ijaje jete alen aō kar pijaiki im bar pijaiki. Kiiō ej juon iaan men ko eļap aō reimaanļo̧k ñani ilo jemļo̧kin juon raan.
Ilo Maaj in iiō in iaar jinoe jerbal ilo The Jones Center āinwōt juon Accounting Assistant im juon ri-ukook ñan kajin M̧ajeļ. Ke iaar jinoe kar ña wōt Ri-M̧ajeļ, ak kiiō ejino loñļo̧k, em̧m̧an ippa kōnke jejjab baj kōjerbal “Hello” im “Good Morning” wōt ak kiiō elak wōr Ri-M̧ajeļ jemaroñ ba “Yokwe” kab “Yokwe in jibboñ”. Ej juon jeram̧m̧an ñan maroñ jerbal ippān juon kombani eo eļap aer kate ñan kōm̧m̧an bwe armej ro ilo jukjukin pād in ren m̧ōņōņō, eñin kar kōņaan eo an Harvey & Bernice Jones rūtto ro raar kajutake m̧wiin. Kiiō ke ewōr juon nañinmej eļap ej jelet kōjwoj kajojo, em̧ōk ad bōk buñten ne ko ñan kōjparok ejjab baj ri-jerbal ro wōt ad ak eļaptata member ro ad im ro rej itok ñan m̧wiin. Ilo ejja iien eo wōt jej kōņaan wōt kakememej aolep ñan ekkōņak māāj ko, kattoļo̧ kwe jān ro jet, im niknik am̧ kwaļe peim̧. Elaññe kwomaroñ, kajjeoñ pād wōt m̧weo im jab iiāio elaññe ejjab menin aikuj. Elaññe ewōr jabdewōt kajjitōk kōn ta activity ko m̧wiin ej kapeļļoki ilo tōrein kwomaroñ lale weepjait eo ilo https://www.thejonescenter.net/. Bar yokwe!
Kab kwōmāroñ alooje staff spotlight video ioon YouTube channel in Jones Center: https://www.youtube.com/watch?v=7P4ShRav3Y4
Chloe Materaiki ej juon Accounting Assistant ilo The Jones Center im ej ukook ilo kajin M̧ajeļ ie.