Kōmeḷeḷe jān William Swain
SALT LAKE CITY, UT—Elōn̄ jabōn Kennan jān manit in ad im jān ro jemed im jimmaad jej maron̄ kōjerbali wōt rainiin ilo ad delmae men ko reppen ilo mour, juōn in “jab kōmakir dekein jinme eo.” Dekā elōn̄ melelein; n̄an waanjon̄ok, “dekā in jibke” ej dekā en emetaltōl kwōj jokālōte jān ilubwilijin elōn̄ ejojik in dekā im n̄e kwōj kedon̄e ippān bar juōn dekā rot in, eutiej ainikier. Dekā kein kwōj kōjerbali ilo eon̄ōd ņe rej ba jibke. Ejjab dekā eo jekōņaan ekkonono kake in. Bar juōn wāween kōjerbale naan in dekā en̄in: Taipoon eo em̧ōj an kōdekākeik arin Namdik. Ejjan̄in dekā eo jej pukote in. Edekāke kilin laddik en jej ekkonono kōn juōn nan̄inmej im jab dekā rot ne kwo maron̄ ekkal ak kadkad kake. Dekā in Jabōn Em, ilo lōmņak ko an elōn̄ ri Kristian, emaron̄ lapļo̧k jān dekā in jinme. Ijoke, ilo an jimor dekā kein jerbal āinwōt juōn jon̄ok n̄an lore ilo ekkal, reaorōk jimor, aolepāer kwo maron̄ kōjerbal melele ko aer ilo mour eo am.
Dekein jinme (dekā in jinme) en emaron̄ juōn wōt dekā ak emaron̄ jet dekā rej ekkar ioon doon lōn̄ļo̧k n̄an juōn utiej eo ekkar. Utiej in ekkar n̄an eje juōn me ej pedped ioon bōkā ņe “eiedik,” ejjab ieeļap.” Epidodoļo̧k eje juon me n̄e ej eiedik bwe kwōj jab aōō ak kwo maron̄ juur laļ ilo am eje lōn̄ļo̧k me in. Mokta jān am eje lōn̄ļo̧k me in kwōj wametoļo̧k im kajutak dekkein (dekā in) jinme en am. Utiejan me in ej pedped ioon jon̄an bōkā eo, im enan̄in aolep iien utiejan en jiljino ne jān ioon aejet. Aolepān me in kiiō enaaj lore jon̄an utiej en an dekkein (dekā in) jinme en. Elan̄n̄e kwo jab lore utter en an dekkein jinme en kwaar katōte, aolepān me en enaaj ban utiejan wōt juōn im enaaj ko kwobban; am en̄taan enaaj waan.
Unin ba “jab kōmakir dekkein jinme eo” kōnke jon̄ok eo en. Ak ejjab jemlok eo in, bwe jān iien n̄an iien kwōj bar itok im lale elan̄n̄e dekken jinme en ej tōt wōt ilo ijen jikin im utiej en an. Ewi wāween an dekkein jinme in jerbal ilo jukjukin pād kdin an ri Majōl ipeļaakin Amedka in?
Ilo coronavirus pandemic in ebool lōmņak em̧ōj kareel kōj kaki; kwōn ekkōņak mask, kwōn jab ekkōņak mask toon wōt am ettolok jiljino ne jān armej; jen rool im jikuul; jen rool im jikuul toon wōt ad ekkōņak mask ioon campus im ettolok jiljino ne jān ri jikuul ro mōttad. Jet taktō rej ba eļapļo̧k jorrāān eo enaajn waļo̧k n̄an ajiri rein nejd elan̄n̄e rej jab iiaio ippān doon. Lukkuun m̧ool eo elōn̄ ri Majōl rej kōnanaik taktō rane ad ilo Facebook kōn wāween aer jumae COVID-19. Emman jumae, ak letón juōn mejlan aban̄ in bwe jen arto-artake im lale ekkar ke bwe en dekkein in jinme eo in ke bwe jen loore. Mokta jān ad ba e bōd taktō rein ad, jen lale peļaak ko ad ikkijien training, imenene in jerbal, im men ko eierļo̧k wōt mokta.
Jet ri kaki in kabun̄ kein rej ba “jab kōņaktok pinjān botūmi n̄an iien ko reaorōk an Anij.” Rej bar ba: “ekkōņak men kane pinjān botūmi ej jab manit.” Rej ba rej jab ekkōņak mask kōnke rej “kwi kōn manit eo aō.” Emakit ke dekkein jinme eo ilo ekkonono rot kein? Elan̄n̄e mennin ekkonono eo ej jumae COVID-19 Coronavirus, ejjab men ep eaorōk in taktō en ej ekkonono half gas in Majōl im Kosrae, ak men eo eaorōk ta eo ej ba im ta jipadpad ko an n̄an jumae virus in. Kein karuo, kōnke training eo an in, epidodoļo̧k aō naaj ron̄jake e.
Dekkein jinme in ej bar jerbal ilo wāween ko jet. Jet iiō remootļo̧k jiljilimjuōn likao emman dettaer rar bwilokwe waļap eo waan Lauton̄a, juōn ian kapen ro relļap ilo Kabinmeto kan. Aelōn̄ eo rej jipadeke e kar Lae. Kapen eo e kar ba “komij jan̄in poojak n̄an jerak,” ak kōnke emman kōto eo im ejjelok koro ilan̄, likao rein rar lōmņak Lae ar anlo̧k. Armej in Ujae rekar ettōr im lo an kapen in karkas waini. “Wa eo en mōttan wōt jidik e dikkilo̧k,” juōn ian lōllap ro rar ba. Kapen eo eaar ba,” “ealikkar ke emman kitwōn jeblaak.” E kar jab ko im Ae En An Jowalōn̄ eaar jetai im kinōōr liktak waļap eo n̄an bar likiej in Ujae en. Ae in ikōtaan Ujae im Lae elōn̄ wa em̧ōj an rupe im ilo tōrre in e kar bar rujruje wa in im kajjidiki. Dekkein jinme eo e kar emmakit ilo an jab likao rein kar jab lore jon̄ok in ejerakrōk eo ikōtaan aelōn̄ kein ruo im kapen eo eritto eaar kanuij melele kake, juōn men eo me ejan̄in kar tokļo̧k ieāne ippān likao ro jibwin. Ak bwe jen Jen jab kōmakit dekkein jinde in” etke jejab “aini wōd eo” im etale melele kin jej pok kaki im elamōjmōj kaki ilo Facebook im ilo Messenger āinwōt “jiniboor etōn̄tōn̄ im aje edebokbok?” Emman kwaļo̧k ainikied, ak jen kwaļo̧ke ilo wāween ko renaaj poukwōj armej. Pukwōj armej melelein “kōmakit dekkein jinme eo.”