Kōmeḷeḷe jān William Swain
Jikuul? Jikuul?! Ke men eo kwōj ba in, ke?! Jikuul board ko ipeļaakin Amedka in rej jutak ikōtaan aelik im aewaar, jon̄an aer pok kōn elan̄n̄e rej jikuul ilo kanem armej, ilo cyber space (distant learning), ak kabodān in men kein ruo—hybrid. Jet rej ba rej kōttar lōmņak ko an taktō ro reļļap im retijemļo̧k ikkijin covid-19 bwe ren jeļā ta remaron̄ ba n̄an kōj ikkijien Jikuul Iiō 2020-21. Ak ettōlo tarrāre melele ko an taktō rein ijjellokin wōt men kein: 1) ettolok 6 ne jān armej (social distancing); 2) en ikutkut am kwale peim 😉 ekkōņak mask elan̄n̄e kwōj pād ilubwilej; im jab jibwe turin mejam. Kōn melele kein jet jikuul ren kar jinoe jikuul iiō in ruo wiik remootļo̧k em̧ōj aer ba renaaj jino jikuul ilo Okōj 24 raan.
Elōn jikuul board rej jab jeļā rej itok ke ak etal ke ilo n̄aat ekkar bwe jikuul ej jinoe. Ak jejan̄n litok lōmņak ko an union ko an ri kaki ro ilo kajjojo jikuul kein an kien im ajiri in Majōl rein rej jikuul ie. Jet jinen im jemān ri jikuul ilo Hawaii rej kōllā wōnāān private tutor ro bwe ren katakin ajiri ro nejeir n̄e jikuul kein re bar ro̧o̧l n̄an distant learning, ak jikuul ilo kapijuknen ko aer. Elōn̄ iaad ri Majōl je bane wōņāāņ kein; kōn men in, ajiri rein nejid renaaj jerata kōn aer naaj le ikilin ri jikuul rein me jemāer im jineer remaron̄i wōņāān kein. Ilo jekjek in, ej kōbaj toojlo̧k tua ņe ikōtaan ri m̧weie im rijeramōl ilo Amedka in. Ealikkar ia—-kōj ri Majōl—jej pād ie ilo ajeej kein, m̧weie im jeramōl.
Elan̄n̄e komij jan̄in kar ron̄ eokwe high jikuul football game eo moktata ilo iiō in ilo aolepān Amedka in eaar bōk jikin ilo 13 Okōj, 2020 ikōtaan Davis im Herriman High Schools ilo Utah. News eo em̧m̧an ilo Fall 2020 Football Season in en̄in; game in eaar bilik m̧aan football game ko ilo Amedka ilo iiō in. Ta news eo nana eo ikkijien ikkure in ekanuij kaitoktok-limo im elolo in ri Pālle rein ilo United States? Ruo ian conference ko ij reim̧aanļo̧k n̄an aluuje an ikkure team ko ie rej Big Ten im Pac 12.
Elōn̄ imenene āinwōt kein jaar karōkitok n̄an muur klein ad āinwōt rumaejet ilo juōn laļ eo eobrak kōn elōn̄ kan armej ie. Jej aikuij melele bwe kar imenene eo ad n̄an jab kajutak peid ilo kilaajroom ilo Majōl ej aikuij oktak. Ajiri rein nejd rej jikuul ilo Amedka in aolep iien ri kaki ro aer rej rōjan̄ er n̄an kōm̧m̧an aer kajjitōk ilo kilaajroom, ilo jikuul assembly ko, im ilo iien basketball im football.
Juōn men ij kajjeon̄ karōktok ilo imenene kein ej an ajiri rā nejū kwalok aer lōmņak ilo MEN OTEMJEJ. Ij jan̄n̄in kar kōm̧m̧ane men in ippān jinō im jema. Ak rainin, ajiri rein nejid ilo Amedka in rej ba ETKE (WHY) n̄an men otemjej jej kōm̧m̧ane.
Ak em̧ool ewōr jet imenene jejan̄in bōk kwnaad ie ak rej luk kun jelōt mour kein ad ilo Amedka in raan n̄an raan. N̄an wanjon̄ok, inne jota, 20 Okōj 2020, kwelok eo eļap an juōn ian party ko relļap ilo Amedka in, Democratic Party, eaar dedelok kwelok eo eļap an im ej kōm̧m̧an aolep emān iiō ilo aer kāalet nomination ko aer n̄an party in. Ilo iiō in raar kāalōt Joe Biden (President) im Kamala Harris (D-California, Vice President). Ej kab naaj wōr juōn kōrā ej jab ri mou em̧ōj an wini nomination in an juōn political party.
Eļapļo̧k jān in, iaar kanuij ron̄jaki naan ko ri jipadek rein raar ba kōnke naan kein renaaj oktak n̄an policy ko renaaj jelōt wāween ad jikuul, taktō im mour ilo Amedka. N̄an waanjon̄ok—im ij kwalok wōt juōn ijin—Medicare for ALL. Elan̄n̄e e win Joe Biden, eo ekar jerbal āinwōt Vice President n̄an Obama, AOLEP renaaj wōr aer MEDICARE CARD. Bon̄ nominee Joe Biden eaar jab kwalok wāween an naaj kōllā wōņāāņ pirokiraam in elan̄n̄e e win.
Wiik in laļ Republican National Convention eo an enaaj bōk jikin. Kobaiki ilo alele in imenene ko ami men in: ron̄jake ta ko renaaj ba im kwelok in eļap bwe men kein rrenaaj jelōt kōj ilo iiō kein emān rej pedotok.
Āliktata, ij kōtmāne bwe aolep ri Majōl rekar bōk kwonaer im Bōnbōn (Census) in ilo iiō in. Aolep melele ko būki jān Census in naaj kōjerbali n̄an kōjemooj ko kien eo iolap an Amedka enaaj kōm̧m̧ani ikkijien jikuul, taktō, im jete jet lelok n̄an kajjojo bukwōn (state) ilo Amedka in.
Elamōjmōj ilo football game ko ej juōn imenene ekāāl ilo mour e aō. Ak ij kememej wōt bwe ālkin game en, ij bar rool nan manit ak imenene eo jibū im jimmaō raar katakin eō bwe in jab kwoļap. Enana katkojooj ej men eo raar katakin eō. Ij lo ilo jekjek in bwe ewōr jikin ekkar bwe in elamōjmōj. Im iiō in eļap aō naaj ajļo̧k bwe elōn̄ college iban lo aer ikkure, juōn imenene ej itok ilo SEASON eo an, Fall.
Āinwōt waanjon̄ok kale ijin, ewōr jikin ekkar bwe jen jab ikōn̄ ie. Kwelok ko an jikuul board ko, n̄an waanjon̄ok, jej aikuij kwalok ainikied ie. Jej jab jeļā jete iaad raar kwalok aer lōmņak kōn distant learning bwe lak baj lale wōņāāņ juōn laptop rainiin eļaplok jān aolep wōņāān jikuul supply ko iaar wiaiki jān ke ajiri rā nejū raar kilaaj ruwatimjuōn. Ak jet jikuul rej jab ņa wāween laptop n̄an ajiri rein nejid im elan̄n̄e jikuul eo an ajiri eo nejūm ej ba enaaj lewōj juōn, eokwe kwōn kwalok n̄an ri Majōl rein wōj ilo Amedka wāween am kar arto-artak men in ippān jikuul eo an ajiri eo nejūm. Wāween de in ad maron̄ rejtak doon, jipan̄ doon im atnijoiki im diojoik jipadpad ko renaaj lakiluluik jukjukin pād in ad.