Kōmeḷeḷe jān William Swain
Kwo nan̄in ke baj kolmānļo̧kijen kōn wāween an kar waļo̧k kajjojo naan ko ilo kajin Majōl? I jeļā, i jeļā— bwebwenato eo ilo Jenesis ej ba bwe aolep kajin kein Irooj ar “pukwōji innām kajeplōklōki” (Jenesis 11). Elan̄n̄e jej ekkartok jān bwebwenato in, innām bar Irooj eo ar bōkļo̧k ro jibwid im jimaad n̄an pok im ņa kan jej ņa etaer Lo̧leļapļap, Majōl. “Kajin,” professor eo aō ilo college ekōn ba, “ej kwaļo̧k kadkad in manit eo am.” Ij errā ilo men in. Lōmņak mōk kōn jet naan rej an̄inwōlāik melele in:
“Enrā bwe jen lale rārā!”
“Kōrā ‘em an kōl!”
“Mōmman im lōmān jimwin waan!”
“Raan in mej raan in lolo armej!”
“Jede Ak eo”
Kobik naan kein “Enrā bwe jen lale rārā” im “kwo mōn̄ā ijabliklik kā, kwo dodo timmej, kwo dodo timmej” im kwo melele ke kajin in ad ej ba jen ajeej. Kwo kobaik naan kein ippān naan in “kwo mōn̄ā ippān jinōm, ekōjatdik eok” im kwo mlele ke ilo manit en ad, jinōm ej ijo jolet en am ej jarjartok jān e. Elan̄n̄e kwe leddik, kwo ban jolete men ko mweien jōmam ilo elōn̄ laļ ilo Esia, Middle East im Africa.
“Kōrā ‘em an kōl,” ekkar n̄an jet lōlļap kaktōtō, n̄e ekāre ippān naan in “jidjidi pein i O, O eo,” ekalōlō ilo lōmņak ke kōrā in Rongelep Atoll retijōmļo̧k tōrejab (dress up). Ijaje mool ke lōlļap ro iaar ron̄ jān er melele in ak kom naaj kōjerbal naan ņe “mejam kapilōk eok” ilo ami ekajet e n̄an kom make.
“Mōmman im lōmān jimwin waan!” Naan in ej kalikkar ke eoktak lōmān wa in juōn emman ej jeke jān bar juōn emman. Ilo bar juōn wāween ba, men̄e men otemjej jej kōmmane ilo nememein jukjukin pād, ej wōr wōt wāween am kalikkar ke ej ejaakūm men en jekdoon n̄e ej n̄an jukjukin pād en am.
“Raan in mej raan in lolo armej!” Ilo jabōn kenaan in jej lo “jan̄ ippān ro rej jan̄, būromōj ippān ro rej būromōj,” jej lo “kōmeram jakli ņe,” im jej lo “rādik doon e doon.” Ilo aelōn̄ in Pālle kein jej ruwaemaejet ie, jej etal n̄an “viewing” en bwe kōnke jej jab maron̄ pād ilo “funeral” en bwe jej aikuij bar ro̧o̧l in jerbal. Ilo aelōn̄ ko ad aolepān jukjukin pād en ej kobatok im jej al itirun ri mej en ruo jilu bon̄ eieo.
“Jede Ak Eo:” AK eņ ej oktan toorlōn̄ en. Ak eņ, ekkar n̄an jet, ej kookrā eo en, juōn kōkallen aorōk in bwij eņ. Ilo tipn̄ōl en, AK en ej pād im̧aan kiju eņ. Ekkā an kōm̧m̧an AK en jān kōn̄e, ekije. Aolep to kan reaorōk im rej kotak kiju en bwe en kotak wūjlā en rej delon̄tok ilo AK en. To kupaak, jomur kan, im to kan rej dāpij an kiju en jab okjak, AK en ej jijōt io̧erwōj. Unin am aikuij jede AK eņ konke n̄e e lot, innām wa en enaaj e ban wōnm̧aanļo̧k ilo kooj eņ an. Ioon aelōn̄ en am, AK eņ ej jeban manit eo eņ. Ak elan̄n̄e ebōd AK Eņ (Jeban Manit), innām aolepān mo̧jen en enaaj bōd. Naan in JEDE AK EO ej katakin kōj aorōk in jeļā kautiej Irooj ro ad.
Ebar wōr juōn naan kōjerbale ioon wa en—ej naan in kiped. Jojoon kiped ņe, natoon e ieb ņe, kanne wōt lobal,” rej naan kan ilo al en an Ainiki Lōme. “Jined Kiped” ej naan eo ej jarjartok jān emman in an wa en jerak. Elan̄n̄e kwōj kōņaan bwe wa eo waam ilo mour in eņ emman an jerak ilo lan̄ ko relļap ilo mour in, kwo naaj aikuiji JIPED eo jān jinōm.
Eļap an lōn̄ jabōn kennaan ilo kajin Majōl jemaron̄ kar likiti ijin n̄an kakememej kōj kōn aorōkier im wāween aer jelōt mour kein ad im wāween ad ekkonono raan otemjej. Naan kein rejelōt eok im ejjelok perre ke rej kōjenolok eok im manit ko am. Im elan̄n̄e kwo jab jeļā kajin eo am im manit eo am, innām kwe ri ia?