Kōmeḷeḷe jān William Swain
Kajin otemjej ej bōktok naan jān bar jet kajin im karōki tok im ālkin jet iien, kōjerbali āinwōt n̄e rekar baj jān wōt kajin en. Barāinwōt, elōn̄ naan rekar jebar wōt jān kajin eo am. Men in jej lo ilo aolep kajin, ekoba kajin Majōl. Naan kein im būkitok jān kajin ko jet emōj ukōti “jipeel-ier” bwe ren ekkar n̄an karkan “jantōj” kojej jei im wāween ekkonono ko ad. Naan kein rej pād ilo al, kōmmao ko ad, jikin jar ko ad, jikin taktō (doctor) ko ad, im ilo jikin jikuul (school) ko ad.
Jān In̄lij juōn ian naan ko ekkā an ri jikuul rein nejid kōjerbale ej “walk.” Jino in aō ron̄ kōjerbale naan in ej ke iaar kilaaj ruatimjuōn ilo Assumption i’Majuro. Ij kab kāāl ļo̧k n̄an Majuro en im ij ron̄ an ri jikuul ro mōtta ba: “Kōjjean̄ walk n̄an Mōn Robert.” “Eļap wōt aō jaje kajin In̄lij,” iaar lōmņak ippa make, “ke ijaje kilen kōjerbal naan in walk ilo kajin Majōl.” Jorjor, etetal, etal kōmean̄ ri jikuul ro mōtta maron̄ kar kōjerbali ak kōm ar kōņaan kwalok am jeļā kajin Pālle.
“Kraun” ej itok jān naan in “crown” ilo kajin In̄lij. Emōj ad ukōte jipeel in bwe en ekkar n̄an kajin Majōl im jon̄an an to ad al kake jej lōmņak ke ej lukkuun Kajin Majōl. Ewāween an Protestant al kake:
“Enaaj wōr ke iju, ewōr ilo aō kraun?
N̄e ejota im al e tulok;
N̄e ij ruj ņa i’lan̄ im ippān ro rem̧m̧an,
Enaaj wōr ke iju ilo aō kraun.”
—Al in Jar im Tun Ko, #
Naan kein kraun, Calvary, im Zaion (Zion) rej jerbal ilo al in:
“Woleo Zaion kal i’lan̄,
Woleo jikin kwelok eo,
Woleo aor ko bōōr (pearl) remouj. . .
“Woleo kraun ioon aolep bar…
“Zaion, Zaion! Woleo Zaion
E wōj Zaion, Zaion Jikin ad Anij.”
—LDS Hymnbook, #44
Bwe kar ia in Calvary? Enan̄in aolep naan in In̄lij rej ijjino kōn leta (letter) in “C” jej jipeel e kōn “K” ilo jipeel in Majōl, ejjab naan in “Calvary.” Ak Zaion eokwe jipeel in ilo kajin In̄lij ej “Zion, ejjelok ainikien “a” ie. Jej jipeel e kōn “a” kōnke ilo kajin Pālle ewōr ainikien “A” ilo ad ba.
Ewōr ad Irooj im lerooj, ak ta ekar jab wōr aer kraun ke? Eaikuij kar wōr kōnke laļ in kariroojoj aelōn̄ in Majōl im āinwōt aelōn̄ ko jet ilo wōdenbwil in Pacific en ewōr aer Irooj im armej rajimjim, e bar wōr aer naan n̄an “kraun”: tiara ilo Tahiti, n̄an wanjon̄o̧k.
Ak kwo nan̄in ke ron̄ aer ba: “Lewaj tibat (teapot) ņe im tile ‘em lale mōk ta kwobban ainbat (iron pot) ņe bwe jen kōkajoor.” Eokwe lukkun m̧ool ke bōlen e kar ejjelok kein kōmat rot kein kōm̧m̧an jān aeen (iron) ilo Majōl kōnke ejjelok aeen i’Majōl. Naan in pot ejjelokilo Kajin Majōl ak emōj ad bōktok bwe en wōjād im ad pepe. Bōlen ejjelok ad kar kein kōmat dān im raij (rice). Oooo. . .ak e kar ewāween ad kar kōmat jōkajeje im bwilitudōk? Ak jejelā ke ri Enewetak rekōn kōmat pankeek (pancake) kōn mejān kaajliin̄—juōn wōt ak emaal juōn baamle (family) jiljino uwaan.
Ewōr jet naan kwōj kiriji bōram kaki n̄e kwōj ron̄ kōjerbali ilo kajin Majōl. Jimmaō ekōn ba n̄an n̄a n̄e ej wōt mijeljel: “Jibwe tok mōk alkoot (sun coat) ņe aō bwe in jab moujlep.” Al (sun) im koot (coat) —etke kwo itōn kōņake kopā ilo wōt ke ej n̄an al? Ewōr ke kopā kwōj kōņake n̄e ej dret jilin̄lin̄? E kar ewi wāween an ejaak naan in? Jimma ekōn jab ba teen̄ki barāinwōt—kajin Japan men in; romrom ej naan eo e kōn kōjerbale.
Ke ij alooj ikkure ilo paak (park) e ilo West Valley, ij kolmānļo̧kijen kōn wāween ad kar ukōte melele in naan in iakiu (ilo kajin Japan baseball, ej jab softball). Iakiu, ilo melele in ad i’Majōl ej jerbal n̄an jimor “baseball” im “softball.” Jej kōjerbale naan in Japan in deenju im n̄e eutiej ball en den̄ōte jej ba takai. Takai rej kōjerbale barāinwōt i’Japan n̄e rej ba eļap wōņāān juōn m̧weiuk.
N̄e jej bwebwenato kōn papa eo an laļ in kein karuo ilo Majōl, ekkā ad emmeloke al eo an Lerooj Abo im J-lik J-war ej al kake rainin:
“Ioon, ioon, miadi kan rej jibaiklaaj im lo,
An lekā ‘em ellāle ioon kodo̧;
In̄ūrn̄ūr in jentoki ko reimajaaj,
Ainikien kikanju re kōleln̄o̧n̄ eō.”
—“Ilo Rujlok in Raan Eo” by:J-lik J-war
N̄e je tōbar melelen kajin Japan kein rikkōn al in e kar kōjerbali ilo al in, pija in pata eo an laļ in kein karuo ioon Jaluit eņ enaaj kar barāinwōt “likit” eok im̧aan joot, bu, im jāje ilo am ko jān poktan̄ im ejjeoror jān wōtlok in poktan̄, ak kwōj jab ba wōt uwaron̄ kōn ainikien kein reimajaaj tok i’lojiln̄ūm.
Aorōk in naan in.
Ak kwo jeļā ke naan in Special Education? Ministry en an Education i’Majōl ej kōjerbale naan in āinwōt am an jeje ijin—ad naan in kiiō, men̄e ejako ilo ̄dictionary ņe. Ak kwo lak etal n̄an imōn taktō (doctor) en i’Delap, men eo moktata nōōj (nurse) ran rej kōm̧m̧ane ej bōki “vital jain kane am.” Rej lale elan̄n̄e kwo pipa (fever) im ewōr am aiblat (high blood). Bōlen ejamin to naan in “vital” enaaj oktak jipeel in āinwōt naan in jain (sign).
Ewōr jet naan emōj ad julok melele ko aer ilo ad kōkarōkrōki tok n̄an kajin in ad. N̄an wanjon̄ok, “charity” ilo 1 Ri Korint 13 jepta. Ilo kajin In̄lij naan eo kōjerbale ilo jepta ne ej “charity.” Naan in ilo kajin Hibru Baibōl ņe ej “agape love”—iakwe em̧ooltata, e m̧wilaļtata, ekwōjarjartata—ejjelok mo̧ņ ie n̄an jidik. Ilo kajin Majōl, ejjelok iakwe rot in. Iakwe rot in ej buwōnjān ri lan̄ wōt. Ilo kajin Majōl, naan in iakwe jej kōjerbale n̄an c”charity” im “love.” Ak ewi meleleier n̄e rewalok ilo juōn wōt jantōj, āinwōt: “…chartiy is the pure love of Christ?”
“Ilo m̧weo imōn Jema, elōn̄ jikin ko” (Jon 14:2), ej juōn ian naan ko an Kraist ekkā ad “quote” e ilo iien ko reaorōk n̄an kōj ri Majōl. Ak naan eo kōjerbale ilo kajin In̄lij ej “mansions”—“In my Father’s house there are many mansions.” Mansions, ilo aō lōmņak ej juōn em eļap in em̧m̧an—aolep men ko rem̧m̧an im aorōk rej kwobban em rot in. Em rot in ej imōn irooj. Ak melelen naan in “jikin ko” e pād ke ilo juōn “mansions?”
Ak jet iien āinwōt jej jook kōn kajin in ad im jej jebar jān ia im jej ekkōn tok wāween ad ekkonono kajin Majōl. Juōn iien juōn kōrā in Majōl eaar call e tok kōrā e Appa jān ioon wharf en an ri eo̧n̄ōd ran ilo San Diego, California. Eaar kōnnanektok kōmro ke em̧ōj an lolo im wia kijen “lōmao” (mōrā ippān Ri Ratak im mao ilo Rālik). E lak ke kōmro ba ek rot in? Kōrā in eaar ba ek ņe e blue im emaroro jidik kilin. Ke kōrā in eaar etal jān aelōn̄ ko ilik i’Majōl n̄an Guam ej roun̄oul jima an iiō im e kar ruo wōt naan in kajin In̄lij eaar jela: yes im no.
Je kar likit melele im wanjon̄ok kein ijin bwe jen kakememej doon bwe jet iien ekkar bwe jen kajitkin rāpeltan an juōn naan jerbal ilo ekkonono, kōmao, im wāween ad konono ilo bok ko ad. Jej lo jān wanjon̄ok kein ke elōn̄ naan ilo kajin ad je kar būktok jān kajin ko jet im rainin rej ad. Jej bar lo ke ewōr jet iien jej jab lukkuun tiljōk ilo ad ukōti tok melelen jet ian naan kein je kar būktok jān kajin in ad. Unin an aorōk in bwe jen kanuij etali.