Kōmeḷeḷe jān William Swain
Jilu wiik remootļo̧k jaar jeje kōn jilu ra ko reddo rebun̄it jukjukin pād in an Ri Majōl ilo United States (Amedka) in: 1) COVID-19 pandemic in, 2) Census 2020, im 3) Ad ri Majōl lōn̄ļo̧k ilo kalbuuj im Due Process eo ad. Jej kadedelok ad ekonono kōn Ra #3, jekjek ko rej walok n̄an kōj Ri Majōl ilo imōn ekajet ko im jemloklok ilo kalbuuj im wāween an due process jelōt case kein. Moktata, ejjelo̧k kajjitōk ke enan̄in aolep case kein ad Ri Majōl rej jarjar jān kadōk, n̄an kōrā im emmaan im ladik im leddik, kab lōllap im lellap.
Ilo to̧ujin in case ko an ri Majōl iaar ukook ie, ewōr jet iaer emaron̄ kar dik kaje ko aer elan̄n̄e armej rein raar jeļā jim̧we ko aer im ta in due process. Kōn men in, jen etal n̄an Kakkobaba kein n̄an lale kajin eo ie.
Jipadpad eo ad ijin ej n̄an karon̄ doon ta jimwe ko (rights) ad armej im kien re ban kōjekdooni bwe emōj kōmlet kaki iumin Jemān Āe eo an Amedka iumin men eo rej ba Due Process. Jim̧we ko am iumin due process clause eo ilo Kakkobaba Kalalem im Kakkobaba Kajon̄oulemān ilo Jemān Āe eo an Amedka rej kile im aikuij kwaļo̧k ak ba n̄an kwe jān wōt tōrre eo pilijmāān ro rej jibwe eok n̄an iien eo kwōj jutak im̧aan juōn ri ekajet im toon wōt am mour ilo Amedka in im ijoko ewōr an maron̄ ie.
Er kein naan ko an due process clause ilo Kakkobaba Kein Kalalem (Fifth Amendment):
“. . . no one shall be deprived of life, liberty, or property without due process of law” (Cornell Law School: Legal Information Institute, Due Process)
Er kein naan ko an due process clause eo ilo Kakkobaba Kein Kajon̄oulemān (Fourteenth Amendment):
“. . . nor shall any State deprive any person of life, liberty, or property without due process of law; nor deny any person within its jurisdiction the equal protection of the laws” (constitutioncerter.org)
Ilak ukōte due process clause in, juōn eo ejjab lawyer im e kar jab ekkatak im train ilo law, en̄in ej ukook eo aō makmake: “ejjelok State emaron̄ kaarmejete ak bōprae juōn armej jān mour, anemkwōj, im mweien.” Ijin, m̧weien ej ekkonono kōn men otemjej m̧weiōm, aolep m̧weiōm.
Ak ta in “Due Process’? Ewōr ruo “type”: substantive im procedural. Procedural due process ej peddled ioon concept in mool im āenwōt juōn [ejjeļo̧k kaljōkļo̧k] Melelein bwe armej eo ņa ruōn e aikuij kar jeļā men eo ak men ko ruōn im kōnke process men in armej in aikuij kar lelo̧k n̄an e “ebwe iien” n̄an uwaak kōn men kein ruōn.
Procedure ej letok juōn bōklekōt ke ewōr bun̄tōn ko aikuij bōki n̄an kam̧oole bwe en ejjeļo̧k perre ke men eo ak men ko ņa ruōn juōn armej ej ak rej lukkun ruōn. En̄in ej unin an wōr ekajet im unin an wōr juōn ri ekajet ej etale juōn case. Ri ekajet in emaron̄ jab “jijjōt ioon” (etale) case eo elan̄n̄e e jeļā kajjen armej ro ilo case eo bwe emaron̄ wōr an kalijōkļo̧k—naaj aikuij kōmakit e jān case eo.
N̄āāt eo im process in ej due (dedeļo̧k ak jemļo̧k)? Ālkin etale aolep kein kam̧ool im ri kam̧m̧ool ro ilo case eo. Melelein men in, kōnke ewōr an jim̧we n̄an juōn “speedy trial” (ekajet emōkaj), ej bar pād ilo Jemān Āe in, innām kwōj aikuij jāde im̧aan juōn ri ekajet iien eo emōkajtata ālkin wōt an pilijmāān ro jibwe eok. Ilo aolep State, melelein “speedy” elan̄n̄e pilijmāān ro raar jibwe im kalbuuji eok ilo jotenin Bōlaide, innām ilo Mande eo ilo jino in wiik eo tok, n̄e epelļo̧k kien n̄an business, kwonaaj jāde im̧aan juōn ri ekajet. Enan̄in aolep State āindein aer “interpret” e naan in “speedy trial” (jouj im riiti “Bill of Rights ilo U.S Constitution).
Ilo jāde im moktata im̧aan ri ekajet eo, ri ekajet eo enaaj riiti men eo ak men ko ruōm (charges). Men kein ekar mōj riiti n̄an bōk ilo iien eo pilijmāān raar jibwe eok. Ak ri ekajet eo ej bar tibidiki im̧aan mejam bwe en ejjeļo̧k ba tokālik ke kwaar jan̄in ron̄ jimwe kein am iumin due process. Ej mōj riiti n̄an men ko ruōm ak ri ekajet eo ej kajjitōk: “How do you plea?” (Ewi wāween am uwaaki men kein ruōm?). Ijo in elōn̄ Ri Majōl rej tūppoki ie im kōmjņoik case ko aer.
Riiti Ri Majōl ilo kalbuuj im Due Process – Mōttan 2
